یامقلب القلوب والابصار
یا مدبراللیل والنهار
یا محول الحول والاحوال
حول حلنا الی احسن الحال
عزیز و ایستکلی دوستلاریم
یئنی ایل بایرامین بوتون تورک ائللرینه تبریک دئیب و یئنی ایلده ائلیمیزه شنلیگ ،ووقار، سعادت و صلح ایله دولو بیر یاشام آرزیلاییرام
قار چیچه گی باشین آچیب
باهار گلیر باهار گلیر
شاختا بابا قویوب قاچیر
باهار گلیر باهار گلیر
داندیلار زیروه بویوندا اوجالان وارلیغیمی
یازدیلار شاختالی سؤزلرده (یالان ) وارلیغیمی
بیر عؤمور کیملیگیمه دالدالانان ...
دون گئجه ائددیلر آخیردا تالان وارلیغیمی
منی هر بیر اؤتن آنجاق یوواسیز سسلیر ه..........ی
آراز آی دالغالی هیرس ایله جالان وارلیغیمی
باشی توفانلی سهندیم دایاق اول اللریمه
قوی عربلردن آلاق بابک آلان وارلیغیمی
گؤزو دار ییرتیجی لاردان سن اؤزون گل قورتار
ساوالان سینه سی وولکانلی قالان وارلیغیمی
داها گل ال - اله باهم قورویاق قان قارداش
آخشام اوستونده گونش تک سارالان وارلیغیمی
یای دومان یای بوتون ائل لرده یاتان لار بیلسین
سسی یالچینلارا تیتره تمه سالان وارلیغیمی
بیر عؤمور کیملیگیمه قئیده قالان وارلیغیمی
اؤزومدن چیخماق ایسته ییرم
ماوي سوچلاريندا اينادين -
سوزمك
و پرده - پرده كؤكلنمك-
يئلين روحوندا
ياغيشين قانادلاريندا
دلي دولو چرشنبه آخشاملاريندا
هادی قان بویالی سئوگی ایزله یه نلر
گؤتورون منی
آلین ،
قاچیرین
یورقانیم سینیب
و...
یاستیغیمدان یاشاران ماهنی لار-
آغاران ساچلارینا امانتدیر بو شه هه رین
گؤتورون منی
( ار ) سیز له میشم
خزر سیزله میشم
اؤزومدن چیخماق ایسته ییرم
yer susub göy susub gadiklar susub
bu susqun gecadan köçür durnalar
qurbatdan-qurbata uçur durnalar
(çillaniz mutlu olsun aziz ellarim)
هاوا آغير،داغ دومانلي ،زيروه چن
يوللار سوسوب ، نه گلن وار نه گئدن
بير يئل اوياق، بير پنجره بيرده من
سئنيب منيم پنجرمده بير دنيز
تورپاق ياسلي ، گول ياسلييام بيليرسيز
من خزرين ساچلارينا وورولدوم
ساحيل-ساحيل چيپ جالانديم دورولدوم
گوزگولرده يول گؤزلديم يورولدوم
سئنيب منيم پنجرمده بير دنيز
تورپاق ياسلي گول ياسلييام بيليرسيز
يايليغيمي ياماجلاردا ايتيرديم
اللريني سطير-سطير گؤتوردوم
بير آلمادا سئوگيميزي بيتيرديم
سئنيب منيم پنجرمده بير دنيز
تورپاق ياسلي،گول ياسلييام بيليرسيز
آ.......ه چئكيلير گ و ن آ ه ياغير شعريمه
بنؤوشه ني قوناق چاغير شعريمه
مومكون اولسا دور گل باغير شعريمه
سئنيب منيم پنجرمده بير دنيز
تورپاق ياسلي ، گول ياسلييام بيليرسيز
بير كه په نك گؤزلريمي قوپاردي
قاناد چاليب قايالاردان آپاردي
مني گزن آختاراردي تاپاردي
سئنيب منيم پنجرمده بير دنيز
تورپاق ياسلي ، گول ياسلييام بيليرسيز
زلزله اثرينده باشيميزا گلن فاجيعه ني عزيز وطن داشلاريما تسليت دييرم
آذربایجان باشون ساغ اولسون
یئنه لال نیسگیلیمیز چؤندو داغا !
آجی حسرتدی یاغیر قول بوداغا
بو نه دحشتدی نه یاسدیر نه آغی؟!!!
آی منیم یاسلی ائلیم قالخ آیاغا
آی منیم یاسلی ائلیم قالخ آیاغا
من سنين درديني نه جور داشييم
آخئ قوللاريمدا ساواش ايزي وار
دوغودا ناللانان كهر آتلي نين
آتينين گؤزونده قان دنيزي وار
داشييم درديني آپاريم هارا؟
قوللاري بوينوما ساريشان قادين
نه دندي ساچلارين بورونوب قارا
اورگ آغريسيندا اونودولمادين
آپاريم درديني ياشاديم نئجه؟
هله سن اؤزوندن دوغولماليسان
بويلانا- بويلانا دان سؤكولونجه
اؤزون اولماليسان،سن اولماليسان
بو گئجه درديني اودا بيلميرم
باخيشي قابارلي شاعير يولداشيم
درديني – درديمه قاتا بيلميرم
اونود گؤزلريني قوي ساغينلاشيم
سني سسله ينده دوداغيم يانير
بوغولور ايچيمده هاراييم هاييم
بو يولون دومانلي باخيشلاريندا
من سنين درديني نه جور ياشاييم؟
سو کیمی آیدینلاشدیق سحر-سحر
و توپراقدان گؤیردیک
یاشیل ـ یاشیل
قوتسال بیر آلاوودان کئچدیگ
دونیانین باشا باشیندا ...
ایلین سون چرشنبه سی بوتون تورک ائللرینه موبارک اولسون
بیر شه هه ر
بیر ائل
مین شاعیر
بیر دونیانی چیئنلرینده قالدیرماغا
یوخ
بیر دونیانی ویدالاشماغا
یوخ
بیر کؤچه رینین نئجه کؤچمه سینی اینانماغا گلمیشدیلر اونلار
بیز آمما
نه دییم آخی...
داغلار آغلار یارالی داغ دره دن آرالی
کؤچه ریدن سورمایین هارالیسان- هارالی؟!!!
دویونلو آخشامین پنجره سینده
شعریمه چیپ جالان سویون سسینده
قاییت قوللاریمی اؤزومه قایتار
***
سنی تاپشیرارام بولودلار یاغا
پاییز دوداغیندا یاغاسان باغا
آز قالیر حسرتین چئوریلسین داغا
قاییت قوللاریمی اؤزومه قایتار
***
بیلمم نه سئحیردی بیلمم نه ایشدی
قارا ساچلاریندان الیم سوروشدو
قوللاریم قیریلیب بوینونا دوشدو
قاییت قوللاریمی اؤزومه قایتار
***
گئی آیاقلارینی قاش قارالاندا
قاطار گؤرپولری فیکره دالاندا
اوگون او آخشامی یادا سالاندا
قاییت قوللاریمی اؤزومه قایتار
گؤزلريمده ياش !
يارالاريمدان مؤژ وئرير قومسال خاطيره لر!
***
آياقلاريم
بو داغدان آشانماديلار
يولداشلاريم ...ساواشانماديلار
يانغين بير سئوگيني ياشايير دوداقلاريم!
قوللاريم
اللريم
بارماقلاريم
... آدديم - آدديم اللريمي داغلاييرام!
بير دنيزين درينليگينده آغلاييرام
***
دامارلاريمدا قان قورويوب
گؤزلريمده ياش
آياق اوسته جان وئريرم
ياواش
يا
وا
ش!!!
سن دنيز قوينوندا من داغ دؤشونده
بيلمه ديم نه ساياق ال-اله وئرديك؟
تئللي دورنالارين سون گئديشينده
سئويشه – سئويشه سئوگي بئجرديك
خزره چئوريلدين خزانا دالدين
نه اولدو ؟ هاياندا ايتيرديم سني؟
بلكه ده ساحيلين قئيدينه قالدين
بلكه ده اونودا بيلميردين مني
داغ دومان ايچينده دورنالار سورگون
گؤزلرين گؤزومه آداخلا نمادي
سؤز وئرديم گؤروشه ياغيشلي بير گون
سنده سئوگي شعري دوداقلا نمادي
بنؤشه سارالدي سئوگي تاغيندا
پاييز ساچلاريني دارايير يئله
بولود وار گونشين قاش قاباغيندا
گؤزلرين قورباني داريخما هه له
درديمي ياشايير سهندین قيزي
سارماشيق دولاشيب تيكان كولونا
يوخومدان آسيليب بير دان اولدوزو
سانكي داغ چئكيليب داغين قولونا
قاري بير گئجه دن گونش اومورام
سئخير اوره ييمي خاطيره لريم
گؤزومو ياخشييا پيسه يومورام
بيلميرم درديمي هاياندان دريم؟
قونوت دوتاندا ـ
یاغیش یاغیر سانکی جننتین ... کال آلما لارینا
« آزان » سسی گلیر
آیاقلاریمدان
ایکی یولون آیریجیندا
چئكيلين يول وئرين آل بايراغيميز يئلله نسين
ساوالانسين سينه ميز لال سازيميز ديلله نسين
سينه سين توز بوروين تورپاغيميز گول له نسين
بالابان چالسين آشيقلار قوجامان داغلاردا
يئني دن گوللر آچيلسين سارالان باغلاردا
ائليمين گوللري سولموش قارا يئل قوينوندا
بير اوزان كؤرپوده سينميش ساري تئل قوينوندا
بيزيم ائلده داغا بنذير سارا سئل قوينوندا
نيگران قالماسين ائل خان چوباني دار گونده
گه له جكدير گؤروشه داردا قالان يار گونده
هله ياتميش ائله باخ قايغي سي باشدان آشميش
سئل اولوب نيسگيلي دولدوقجا اوره گدن داشميش
بو ائلين ائلچي سي دارگونده قالانلار شاشميش
بيري وار الده قرنفيل دولانير ديللرده
اؤزونو چن بورويوب قارداشي نيسگيللرده
اويانين بذ قالاسيندان ائله بيل هاي گلدي
بيزه قيسمت دييه سن تانريدان آل پاي گلدي
سينه گرميش ساوالاندان بير اتك ياي گلدي
چئكيلين داغلارا چيلغين دلي لر گون باتدي
قارا ظولمت گونشين كؤرپه جيگين آغلاتدي
بو نه ياتماقدي قارانليق چؤكولوب هر يئرده
گونشين گؤز ياشي دن-دن تؤكولوب هر يئرده
تانرينين كؤينه گي دالدان سؤكولوب هر يئرده
قالانيب داغ كيمي درد اوستونه خالقين دردي
نه دورومدور بو نه دحشت بيزه اوز چؤندردي؟!!
بيليرم داغدا دومان وار و...يولوم داشلانميش
آنامين گوزگوسو باشدان – باشا قارقيشلانميش
نه بيليم بلكه ده شعريمده كولك باشلانميش
گئديرم چنلي اوزاندان دئميرم قوي قالسين
او سينيق كؤرپوده آخشام چاغي قارمان چالسين
بیر چیچه یم کوللار اوسته
یورقون آرقین یوللار اوسته
آل قوینونا دسته -دسته
آپار منی - آپار منی
بورا شاختا بورا قاردیر
بوردا دونوب هر نه واردیر
اولوب قالان «سون باهار»دیر
آپار منی - آپار منی
«آی باخیشلی» دنیز قیزی
اؤزون بوغور دان اولدوزو
باس باغرینا قیپ - قیرمیزی
آپار منی - آپار منی
یاریم نیسگیل یاریم یارا
توش گه لمیشم یازدا قارا
گه ل بو قاری یارا - یارا
آپار منی - آپار منی
گه ل کؤکومدن قوپار بیر گون
هئچ اولماسا آپار بیر گون
منی گه زه ن تاپار بیرگون
آپار منی - آپار منی
سن سيز شعر اوتاغيم درده قالانميش
سن سيز قافييه لر اوددوتوب يانميش
نئيليرم ياغيشي نئيليرم يازي
سني سيزيلدايير كؤنلومون سازي
(سن) دييه چيرپينير سينير اوره ييم
تئللي بير به نؤوشه يونور اوره ييم
سويوق دووارلاردا دونور اوره ييم
نئيليرم نامازي نئيليرم نازي
سني سيزيلدايير كؤنلومون سازي
لحظه لر اوزانير دومان ايچينده
قالميشام آوارا گومان ايچينده
ياخشيني ايتيرديم يامان ايچينده
نه قيبله سي به للي نه دسته مازي
سني سيزيلدايير كؤنلومون سازي
قيناما ساچلاريم بورونوب قارا
بير باخيش سئويرم باغريمي يارا
يئتره درديمي آغ بولودلارا
اي يالخي محبت ، اي آلين يازي
سني سيزيلدايير كؤنلومون سازي
سن سيز سويوق گئجه لرده
قالديم يولا باخا – باخا
اؤز اليمله « قار چيچه گين»
سالديم يولا باخا – باخا
ه...ي، ال – اله دويمه ده له
دئديم بلكه «دورنام »گه له
تئللي سازي آلديم اله
چالديم يولا باخا – باخا
دولانيرديم پرده – پرده
بوينو بوكوك لال شه هه رده
توپراق اوسته چؤكن درده
دولدوم يولا باخا – باخا
گيلئي لنديم اوفوق لاردان
ساچلاريما ياغان قاردان
سوراغيني سون باهاردان
آلديم يولا باخا – باخا
نه ياغيشدان بير خبر وار
نه باغچامدا گوللو باهار
قاپي ميزدا قالاندي قار
سولدوم يولا باخا - باخا
سنينله يم، سولدوگونش باتدي آي
قافييه لر فيكره دالير هارداسان؟
گؤزلريمين قاراسيندا لاي بالاي
آيريليغدي چؤكوب قالير هارداسان؟
******
باغيريرام سسيم باتير ايچيمده
سنسيزليگيم سنه چاتير ايچيمده
بو شاختادا - شاختا ياتير ايچيمده
گونش آخيب قاش قارالير هارداسان؟
******
يازي يازان قارا يازيب يازيمي !!!
هئچ بيلميرم هارا يازيب يازيمي!!!؟
سينم اوسته آلديم سينيق سازيمي
بوساز سندن ايلهام آلير هارداسان؟
******
سن خزره چئوريليرسن بير آندا
من دومانا قارق اولورام دوماندا
بارماقلاريم شاه پرده يه جوماندا
تئل قيريليرماهني سولور هارداسان؟
سئوگی بیر گوناه دیر ایچیمده منیم
اؤزومو ایتیردیم اؤزومو داندیم
سئوگی درین آه دیر ایچیمده منیم
دئمه «آیریلیق »دیر چؤکوب تئلینه
دئمه ناغیل لاردا سؤزون قالاجاق
قووزانیب اوچساندا گونش ائلینه
«دومان» لی یوللاردا گؤزون قالاجاق
من سنی سئویرم بو اوره ک بو قان
سئوگی سیز هه له ده گولمه یه جک سن
بیلیرسن ؟ خزره چئوریلن زامان
سن منی اونودا بیلمه یه جک سن
یالین فاصیله لر آییردی بیزی
نه سنده گوج قالدی نه منده داها
بیزه ایلهام اولدو بیر آلما ایزی
بیاض بیر گئجه ده باتدیق گوناها
گئتمه گ ایسته ییرسن او یول - اودا سن
آمما سئوگی میزه ده یمه سین الین
باخ اوجا داغلاری بورویوبدور چن
اؤزوندن یه لیگ اول آی ساری گه لین
من یانماسام